Serbski sejm gratuluje nowymaj serbskimaj radomaj w Braniborskej a Sakskej

W Braniborskej a w Sakskej stej so nowej serbskej radźe wuzwoliłoj. Serbski sejm gratuluje nowym radźićelam a přeje jim, zo móhli politiske rozsudy w Braniborskej resp. Sakskej na pozitiwne wašnje wobwliwować. Serbski sejm je na konstruktiwnej zhromadnosći a mjezsobnej podpěrje zajimowany, zo by so situacija serbskeho ludu polěpšiła.

W Sakskej buchu čłonojo serbskeje rady přez krajny sejm woleni. Serbski sejm wobžaruje, zo jeho wot Smy z.t. nominowany kandidat dr. Tomaš Wornar wot krajneho sejma dosć hłosow njedósta. Z tym krajny sejm cyłkownje bohužel ze wjetšinu ignorowaše žadanje Europskeje rady, wobkedźbować wšelakorosć znutřka serbskeho ludu. 53 hłosow pak je přiwšěm kedźbyhódny wuspěch, dźakujemy so frakcijam, kotrež su za našeho kandidata hłosowali.

Wosebite wuzběhnjenje zasłuža mjeztym wospjet wupruwowane wólby serbskich radow w Braniborskej: Woni so přewjeduju swobodnje přez serbski lud w Braniborskej. Woni su přikład za wólby Serbskeho sejma jako cyłoserbske ludowe zastupnistwo. Wšitke serbske zjednoćenstwa móža kandidowacych nominować, wšitcy přisłušnicy serbskeho ludu móža wolić.

Serbske rady su jako přirady při krajnymaj sejmomaj w Braniborskej a Sakskej kaž tež pola sakskeho statneho knježerstwa zapołožene. Serbski sejm rozumi so porno tomu jako parlamentariske zastupnistwo k wutworjenju politiskeje wole serbskeho ludu a chce w Serbskich zakonjach krajow wobstejacu politisku dźěru za serbski lud zawrěć. Dołhodobnje prócuje so Serbski sejm wo wutworjenje serbskeje korporacije po zjawnym prawje. Přez to móže so serbski lud wot ryzy poradźowaceje funkcije sem k přewzaću swójskeje zamołwitosće emancipować. To by tež ramik za dźěławosć serbskich towarstwow a třěšneho zwjazka Domowiny rozšěriło.

Wólby do druheho Serbskeho sejma wotměja so hišće hač do 27.02.2025. Wolerki a wolerjo móža so pisomnje abo online za wólby registrować. Za 24 mandatow požada so 39 kandidatkow a kandidatow.