Počesćenje Jana Skale
Sobotu, 11. januara 2025, wotmě so w Njebjelčicach wosebite zarjadowanje k počesćenju Jana Skale, wuznamneho serbskeho basnika, publicista a politiskeho aktiwista, kiž so čas žiwjenja zasadźowaše za samopostajowanje serbskeho ludu. Składnostnje jeho 80. posmjertnin zhromadźichu so kandidowacy Serbskeho sejma, zastupjerjo Domowinskeje skupiny kaž tež dalši zajimcy, zo bychu jeho zasłužby spominali.
Zarjadowanje započa so w 15:30 hodź. z połoženjom wěnca při pomniku Jana Skale pola pěstowarnje w Njebjelčicach. Zhromadnje bu pioněr politiskeho samopostajowanja serbskeho ludu počesćeny. Po tym sćěhowachu w katolskej Bjesadźe čitanje basnjow z hudźbnymi přinoškami kaž tež postrowne słowa. Při tym rozprawještaj Jurij Łušćanski a Křešćan Krawc wo swojich wosobinskich zetkanišćach z Janom Skalu w swojim žurnalistiskim resp. politiskim dźěle. W swojim postrowje spinaše dr. Pětr Kroh, wnučk a biograf Jana Skale wobłuk jeho žadanjow před lětstotkom hač do přitomnosće a na skutkowanje Serbskeho sejma.
Do toho zetka so 22 wot 39 kandidowacych Serbskeho sejma k intensiwnej dźěłarničce w přihotach wólbow sejma. Při tym so mjez sobu předstajichu a wuměnjachu so wo swojich wosobinskich pozadkach, jich zwjazanosći k serbskemu ludej kaž tež swojich zaměrach za sobudźěło w Serbskim sejmje. W fokusu stejachu aktualne a přichodne ćežišća dźěła kaž naćisk statneho zrěčenja, kubłanskopolitiski koncept a wuwiće serbskeje wustawy.
Dalši centralny dypk bě požadanje bliskich wólbow sejma, zo by so zajim wolerkow a wolerjow zbudźił. Nimo toho předstaji so přiručka wo dźěle Serbskeho sejma, kotraž ma přechod wot prěnjeje do druheje legislaturneje periody wolóžić a principy kaž mjezsobny respekt a orientaciju na konsens skrućić.
Dźeń wuklinča při kofeju, tykancu a ludowym spěwanju w towaršliwej atmosferje. Wobdźělnice a wobdźělnicy mějachu składnosć, so wo serbskich temach wuměnjeć, kontakty nawjazać a nowe nastorki sobu wzać. Zarjadowanje njeskićeše jenož rum za dopominanje na Jana Skalu, ale tež za žiwy dialog wo přichodźe serbskeje zhromadnosće.
Přeprošacy dźakuja so wšitkim wobdźělenym a přeprošuja zjawnosć, so dale aktiwnje na wuhotowanju serbskeho přichoda wobdźěleć. Zhromadnje móžemy namrěwstwo Jana Skale wobchować a nowe puće za serbsku kulturu a identitu wotkryć.