Zastojnstwowe sudnistwo Drježdźany: Pšosba wó spěchowanje źěła Serbskego sejma wóstanjo nejpjerwjej wótpokazane

Zastojnstwowe sudnistwo Drježdźany: Pšosba wó spěchowanje źěła Serbskego sejma wóstanjo nejpjerwjej wótpokazane - zasadne pšašanja dalej njerozjasnjone

Pśed 5 lětami jo towaristwo „Smy z.t.“ póžedało spěchowańske srědki Załožby za serbski lud, aby se źěłabnosć Serbskego sejma pódpěrowała z jadnańskim běrowom. Załožba jo to tencas wótpokazała. Nic pśeśiwo wótpokazanju, ale dla njedosegajucego wobtwarźenja jo „Smy z.t.“ skjaržył pśed zastojnstwowem sudnistwom Drježdźany. Sudnistwo jo skjaržbu wótpokazało pó jadnanju dnja 18.11.2025.

Serbski sejm woblutujo toś ten rozsud, pokazujo pak na to, až sudnistwo njejo wobglědowało centralne dypki spěchowańskeje prakse załožby. Wóna jo stojała w srjejźišću jadnanja – a how pokazuju se grawěrujuce pśeśiwjenja, kótarež sudnistwo njejo mógło rozpušćiś.

Pśi jadnanju a wusuźe https://www.medienservice.sachsen.de/medien/news/1092590 jo se wujasniło:

• Drje spěchujo załožba źěło Domowiny, njewiźi pak toś te sredki eksplicitnje ako spěchowanje politiskego źěła. To njejo źěl zaměra załožby.

• Rola ako politiske zastupnistwo se Domowinje "wótwenka" napołožyjo. Wóna drje se politiski wugronijo, ale jano, gaž ju wótwenka pšašaju.

• Dokulaž Domowina žedno spěchowanje za politiske źěło njedostawa, njama teke Serbski sejm z pśicynow jadnakego wobchadanja dla žedno pšawo na take spěchowanje.

Z togo slědujo zasadnje: Wobstoj Serbski sejm, kótaryž se ako zastupnistwo serbskego luda a potencielny spěchowański pśedmjat statnych srědkow daniž wót Załožby za serbski lud, daniž wót zastojnstwowego sudnistwa do pšašanja njestaja.

Ale nastawaju tśi konflikty:

1. Statne kazni njepśedwiźe žedno politiske zastupnistwo serbskego luda. Weto trjeba stat ze serbskego luda politiske stojnišća a pšaša se za nimi. Wótegrona jo dostał dotychměst wót towaristwa bźez demokratiskeje legitimacije. Toś tu politisku rozdoru jo Serbski sejm wót lěta 2018 sem zacynił. Samopóstajowańskemu pšawoju ludow a demokratiskim zasadam slědujucy, trjeba serbski lud licho wuzwólone politiske zastupnistwo. Ze Serbskim sejmom ma take zastupnistwo. Sakska Serbska kazń ma se wótpowědnje pśiměriś.

2. Stat dej pśipóznaś, až ma se politiske źěło serbskego luda rowno tak spěchowaś ako druge wobłuki, ako su pomjenjone w zaměrje Załožby za serbski lud. Wón dej wujasniś, až jo teke demokratiska, politiska kultura elementarny źěl serbskeje kultury - abo pśedmjaty spěchowanja wudopołniś. Zaměr załožby ma se wótpowědnje aktualizěrowaś – gaž co stat Serbski sejm ako politiske zastupnistwo serbskego luda na drugu wašnju rědowaś a spěchowaś.

3. Domowina, Zwězk Łužyskich Serbow z.t. definěrujo politiske źěło jasnje ako jaden ze swójich głownych nadawkow (nožka: kapitel 7 "Politiska participacija" w programje Domowiny; https://www.domowina.de/dsb/domowina/glowna-zgromazina/17-glowna-zgromazizna-domowiny-2832015-w-haslowje/program-domowina-2025). Južo něnto wužywa wóna bytostne źěle Załožby za serbski lud wugbanych spěchowańskich srědkow za swójo politiske źěło. W zmysle jadnakego wobchadanja ma se teke źěło Serbskego sejma spěchowaś.

Z tym zwězane ma se stajiś pšašanje, lěc jo załožba pó how wuzjawjonem swójskem měritku pśez lěta zjawne pjenjeze rozdawała ze zaměrom se njemakajucy.

Toś te njerozjasnjone zasadne pšašanja njepśedstajaju žedne pódlańske dypki, ale nastupaju jědro serbskego samozastojnstwa a pšawnisku wěstosć statneje mjeńšynoweje politiki.

Smy z.t. wusud ze Serbskim sejmom kradosćiwje pśespytujo a wobradujo wó dalšnych pšawniskich kšacach. Zrazom napominaju załožba a ju nosece statne kněžaŕstwa, skóńcnje wutwóriś jasnosć wó pšawniskej roli politiskego zastupnistwa Serbow. Demokratiski wuzwólony parlament njesmějo se trajnje tłocyś do bźezpšawnego wakuuma.

Žrědło: program DOMOWINA – Kap. 7 - politiska participacija
Domowina zastupujo na zakłaźe rědowanjow Serbskeju kaznjowu zajmy serbskego luda. Wóna stara se wó rozšyrjenje sobu- a samopóstajowańskich pšawow a winowatosćow pśedewšym w serbskich politiskich, kulturnych a šulskich nastupnosćach. Jadnamy ze wšyknymi demokratiskimi politiskimi partajami, wótpósłańcami a gremijami na komunalnej, krajnej, zwězkowej ako teke europskej rowninje. Zarucujomy politisku artikulaciju Serbow za zwopšawdnjenje serbskich zajmow a pśesajźenje našych pšawow a delegěrujomy za to serbskich zastupnikow do póraźujucych a rozsuźecych gremijow.
Rady, pśirady a wuběrki ako teke zagronite resp. społnomócnjone za mjeńšynowe abo serbske nastupnosći su wažne partnarje a multiplikatory pśi zwopšawdnjenju zajmow Serbow na wšyknych politiskich rowninach.
Zawěsćujomy z našym politiskim źěłom zdźaržanje trěbnych financielnych zakładow za serbske pótrjeby we financnem dojadnanju mjazy Zwězkom a krajoma Bramborska a Sakska, ako teke dalšne spěchowańske srědki.