DEMOKRATIE-OMNIBUS wabi we Łužycy za wólby do 2. Serbskego sejma a do serbskeje rady

W Kamjeńcu jo „OMNIBUS FÜR DIREKTE DEMOKRATIE“ swóju turu pó Łužycy startował, aby se na wólby do 2. Serbskego sejma pokazało. Hyšći až do 20. septembra woglěda OMNIBUS do wjele městow a jsow nejpjerwjej w Górnej Łužycy, pótom w srjejźnej Łužycy a skóńcnje w Dolnej Łužycy. Organizatory informěruju wó źěle Serbskego sejma, trjebnosći mócnego ludowego zastupnistwa ze šyrokeju legitimaciju a wó wólbnem procesu. Rowno tak móžoš se direktnje za wólby registrěrowaś.

„Smy zagórjone a źěkowne, až OMNIBUS FÜR DIREKTE DEMOKRATIE gibanje demokratije ‚Serbski sejm‘ a serbski lud někotare tyźenje z toś teju turu pódpěrujo“, měni Tomaš Čornak, kótaryž turu wjeducy organizěrujo (kontakt: 0173 2673101).

Werner Küppers, kótaryž OMNIBUS FÜR DIREKTE DEMOKRATIE južo wjele lět wóźi a se wót dobrowólnikow pśewóźujo, wudopołnijo: „Zaměr Serbskego sejma, we wažnych pšašanjach pśichoda serbskego luda sam zagronitosć pśewześ a bazodemokratiski na městnje rozwězanja pytaś a zgromadnje pśesajźiś, wunjaso naźeju a zgromadnje zbuźenje w aktualnych, za demokratiju śěžkich casach, teke granice Łužyce pśesegajucy. To jo za nas ned se wuwijało na wutšobnu nastupnosć.“

„W Dolnej Łužycy wabi OMNIBUS FÜR DIREKTE DEMOKRATIE rowno tak za paralelnje se wótmějuce wólby Rady za nastupnosći Serbow pśi Bramborskem krajnem sejmje (via www.wahl-rasw.de)“, wjaseli se Rainer Vogel, cłonk wólbnego wuběrka za bramborsku Serbsku radu a kandidat za 2. Serbski sejm.

Na tourowy plan móžo se wšednje na www.serbski-sejm.de glědaś. Pytaju se hyšći sobuwójowarje, kenž kśě w OMNIBUS-teamje pśecej za jaden źeń sobu cyniś.

Wólarje a wólaŕki maju se až do 23.01.2025 k wólbam registrěrowaś.

Serbski sejm jo demokratiski legitiměrowane ludowe zastupnistwo Serbow a zasajźujo se za zjawnopšawnisku korporaciju serbskego luda a nutśikowne samozastojnstwo, wósebnje w kubłanju a kulturje.