Posedźenje Serbskeho sejma w Běłej Wodźe: Strukturna změna / Program k samopostajenju / ILO 169 / Dźak z cyrkwje / Financowańske požadanje

Dnja 17. hapyrleje je Serbski sejm na přeprošenje běłkowskeho wyšeho měsćanosty wuradźował w tamnišej radnicy (z wideo-přizamknjenjom). W swojej postrownej narěči je k. Torsten Pötzsch Serbam přał skutkowniši politiski hłós kaž tež wjele wuspěcha při předstajacych jednanjach k statnemu zrěčenju. Wón rozprawješe wo zesylnjenju prezency serbskeje rěče w měsćanskej zjawnosći Běłeje Wody. Starobna prezidentka sejma E. Pjeńkowa dźakowaše so wyšemu měsćanosće wutrobnje za jeho podpěru sejmoweho dźěła. Z widom na swójske wójnske nazhonjenja jako dźěćo wupraješe so wona starosćiwje wo aktualnej diskusiji wo wuwiću Běłeje Wody na wojerske stejišćo a pledowaše za ciwilne, na přichod wusměrjene dźěłowe městna w ramiku strukturneje změny a za demilitarizaciju Łužicy.

Ćežišćo wuradźowanja běše pódla wobzamknjenja „Programa k demokratiskemu samopostajowanju serbskeho ludu“ wone njedawno přez Zwjazkowy sejm wotměte ratifikowanje ILO 169, UN-wujednanje k škitej indigenych ludow, kaž tež z toho wurosćace prawa za serbski lud. Při tym zwěsći so njepřewidźomny informaciski deficit w ludnosći. Tak widźi so zdźěla samo hišće wšědne nošenje ledźboweje falki jako bytnostna kajkosć indigenych ludow, hdźež so tola we woprawdźitosći po cyłym swěće indigenita a nowočasne wašnje žiwjenja w žanym padźe njewuzamkujetej. Tutemu kublanskemu njedostatkej chce Serbski sejm přez wšelake informaciske poskitki wotpomhać a z diskusijnymi formatami proces wutworjenja měnjenjow w serbskem ludźe powyšeć. Na jeho kóncu steji wona za wužiwanje prawow rozsudna subjektiwna definicija ludu jako indigeny přez serbske ludowe zastupnistwo, jako centralny definiciski kriterij wotpowědnje art. 1 teje ILO-konwencije.

Wozjewił je so tež dźakny list ewangelskeho serbskeho superintendenta Christopha Rummela. Byrnjež so poprawny zaměr swójskeje struktury we wobłuku serbskeho sydlenskeho teritorija njedocpěł, je tola wjelestronska podpěra Serbskeho sejma jasnje skrućiła poziciju serbskich křesćanow a tež wjedła k někotrym substancielnym polěpšenjam, tohorunja je wšitkim wobdźělenym wobstaće a prawa serbskeje mjeńšiny we wobłuku Sakskeje krajneje cyrkwje jara jasnje wuwědomiła.

Wo pohibowanju zboka Załožby za serbski lud w naležnosći požadanja institucionelneho spěchowanja rozprawješe finančny wuběrk. Požadane su wšelke podłožki, kotrež so aktualnje zestajeja.