Załožba a prěnje spožčenje „Myta Jana Skale“ Serbskeho sejma

Składnostnje konstituowaceho posedźenja 2. Serbskeho sejma bu prěni raz „Myto Jana Skala“ spožčene. Čestne myto Serbskeho sejma hódnoći wusahowacy angažement za samopostajowanje a kulturno-politisku emancipaciju serbskeho ludu. Prěnje lawreatki a lawreaty su Edith Pjeńkowa z Rownoho, Johannes Heimrath z Małeho Jasedowa a dr. Měrćin Wałda z Njeswačidła.

Edith Pjeńkowa počesći so za swój angažement čas žiwjenja k zachowanju kultury, rěče, přirody a domizny Łužicy. Wona steji přikładnje za swoje spjećowanje přećiwo hospodarskim zajimam na kóšty domizny kaž tež za swoje skutkowanje jako prěnja starobna prezidentka Serbskeho sejma.

Johannes Heimrath počesći so za swój mnohostronski a njesebičny angažement za wnučkokmanu, ekologisko-socialnu a kulturnje mnohostronsku towaršnosć, wosebje za swój wažny přinošk k politiskej samoorganizaciji serbskeho ludu ze swojej njesprócniwej podpěru Serbskeho sejma k na konsens orientowanemu dźěłu město na konfrontatiwne debaty sadźacemu parlamentej.

Dr. Měrćin Wałda počesći so za jeho wutrajne a zmužite zasadźenje, serbski lud z róle prošerja rozwjazać a jemu – přez wědomostne rozswětlenje, zjawnu debatu a politiske sobuwuhotowanje – k sebjewědomemu městnu jako runoprawny a samopostajeny partner w towaršnosći dopomhać.

Mjenodawar myta je Jan Skala (1889-1945) – žurnalist, lyrikar, politikar a jedyn z najwuznamnišich předmyslerjow serbskeho samopostajowanja w 20. lětstotku. Skala njerozumješe Serbow jako kulturna nakromna skupina, ale jako samostatny lud z prawom na politiske sebjezastupowanje a narodne rozwiće. Čas swojeho žiwjenja staji wón so přećiwo asimilaciskej politice němskeho narodneho stata a kritizowaše zdobom jenož folkloristiske zaznaće serbskeje identity. Ze załoženjom Łužiskeje ludoweje strony 1919 prócowaše so wo politiske zastupnistwo Serbow na – wo jasne znamjo za swoju předstawu wo serbskej awtonomiji. Přez swoju mjezynarodnu dźěławosć, na přikład na Europskich narodnostnych kongresach w Genfje, zakótwi Skala serbske prašenje w europskej debaće wo mjeńšinowych prawach. Publicistisce a politisce zasadźi so doraznje za jenake prawa Serbow – nic jako prošer w swójskim kraju. Myto Jana Skale Serbskeho sejma chce na tele stejišćo dopominać a tych česćić, kiž dźensa w duchu Skale za prawa a přichod serbskeho ludu steja. Wón je ze slěbornej jehličku, kotraž płód lipy pokazuje, dotěrowany.