Wuličenje hłosow k wólbam 2. Serbskeho sejma
8. měrca buchu w Njebjelčicach wotedate hłosy k wólbam 2. Serbskeho sejma pod nawodom wólbneje komisije zjawnje wuličene.
12. meje 2024 bě nawoda wólbow serbski lud k wólbam namołwjał. 10. decembra 2024 wozjewi wólbna komisija mjena 39 kandidowacych a započa z rozpósłanjom wólbnych podłožkow. Hač do 6. měrca 2025 móžachu wolerki a wolerjo swoje hłosy wotedać. Wólby wotměchu so bjezwuwzaćnje jako listowe wólby.
Nawoda wólbow Siegfried Kühn a zastupowaca wólbna wjednica Marlis Pjacec wozjewištaj nachwilny wuslědk. Tutón hodźi so pod www.serbski-sejm-2024.de wotwołać. Wotpowědnje tam tohorunja k downloadej k dispoziciji stejacemu wólbnemu porjadej bu 24 zapósłancow kaž tež naslědnikow postajenych a so nětko přez nawodu wólbow informuje.
Tomaš Čornak, rěčnik wólby organizatorisce podpěraceho wólbneho wuběrka, k wuslědkej: Wuspěšne přewjedźenje wólbow je přiležnosć k wjeselu. 1.006 wosobow bu na próstwu do wolerskeho lisćiny zapisanych. 762 su jim sposrědkowane wólbne listy wróćo pósłali.
Serbski sejm móže na stabilnu podpěru w serbskim ludźe twarić. Tež hdyž bě ličba wolerkow a wolerjow trochu snadniša hač k wólbam prěnjeho Serbskeho sejma w lěće, tak so tola pokaza, zo wobsteji stajne wolerstwo, kiž chce w serbskim ludźe swobodne wólby za ludowe zastupnistwo a najebać mnohe hišće wobstejace zadźěwki a wotewrjene prašenja nałoži znowa zmužitosć a angažement, stać za sam postajeny přichod serbskeho ludu.
Njewotwisnje wot politiskeho wusměrjenja, kotrež budu nowi zapósłancy druhemu Serbskemu sejmej dać, je zaměr, při přichodnych wólbach wyše wobdźělenje docpěć. K tomu kaž tež ke konstruktiwnemu zhromadnemu dźěłu z nowym Serbskim sejmom na dobro našeho ludu a wšěch Łužičanow namołwjamy hižo nětko wšitke wosoby, towarstwa, zwjazki a institucije.
W mjenje Serbskeho sejma dźakuju so cyle wutrobnje čłonam wólbneje komisije Siegfriedej Kühnej, Marlis Pjacec, Betinje Kralowej, Anje Lindnerowej a Domenico Gruhnej, kotřiž su z wulkim angažementom a wjele zapodatym časom dospołnje čestnohamtsce tute demokratiske wólby serbskeho parlamenta zmóžnili!