Serbska debata „Serbska kubłanska awtonomija abo dale kaž dotal?“

Dnja 13.03.2024 wot 19 hodź. wodźěluje so dr. Měrćin Krawc jako čłon Serbskeho sejma w Chróšćanskej Jednoće jako podijowy hósć na 2. „Serbskej debaće“. Zarjadowarjo su Serbske Nowiny, Krajna centrala za politiske kubłanje a Załožba za serbski lud, přez kotrejež internetnu stronu budźe tež livestream k dispoziciji.

„Wotewrjena wuměna na podiju a z awditorijom wo móžnosćach samopostajowanja serbskeho ludu je Serbskemu sejmej zdawna wažna naležnosć. Zastupjerjo Serbskeho sejma su rjad zarjadowanjow sobu iniciěrowali, tuž so jara wjeselimy, zo so tute wažne diskusije z wobdźělenjom šěrokeje wšelakorosće akterow nětko zmóžnja, a tohodla chcedźa za Serbsku debatu sobu wabić“, tak Měrćin Krawc, čłon kubłanskeho wuběrka Serbskeho sejma.

Dwě naslědnej zarjadowani ´Serbskeje debaty´, tohorunja z hosćimi podija Serbskeho sejma, wotmějetej so dnja 20.03.2024 w Serbskim domje w Budyšinje na temu „Štó chcemy być? Indigeny, awtochtony abo něšto druhe?“ a dnja 10.04.2024 k temje „Štó zastupuje serbski lud? Přichod politiskeje participacije“ we Wojerowskej Łužiskej hali.