Přeprošenje na diskusiju wo projekće „Serbski kubłanski system přichoda“
Hižo dołho činja sebi mnozy akterojo a angažowani Serbja mysle wo tym, kak hodźało so serbske šulske kubłanje polěpšić. Hłowny zaměr při tym je, na wsach, we swójbach a dalšich kruhach, w kotrychž so hišće wšědnje serbsce rěči, serbsku rěč zdźeržeć a ju tam, hdźež je so pominyła, wozrodźić. Ideje du wot punktuelnych polěpšenskich namjetow we wobłuku statneho šulskeho systema přez zwjazk serbskich šulow a předstawy k serbskim priwatnym šulam hač k daloko sahacej zjawnoprawniskej kubłanskej awtonomiji z wobšěrnym wuhotowanskim rumom.
Iniciatorojo Serbskeho sejma a dalši běchu mjez druhim lětsa w aprylu na hłownej zhromadźiznje Domowiny - Zwjazka Łužiskich Serbow z.t. Tam sej Domowina ambicioněrowany zaměr staji, hač do kónca lětstotka 100.000 rěčnikow docpěć chcyć. Tohodla mjenowani iniciatorojo zmužiće krok k hižo dawno diskutowanej kubłanskej awtonomiji namjetowachu. Rezonanca bě dobra a wšelake ideje buchu konkretizowane. Nimo toho prašachu so wosebje wučerjo iniciatorow, kak maja so woni zapřijeć. Skónčnje přihotowaše so projektowy koncept, kotryž chcemy rady z Wami wšěmi zhromadnje diskutować.
Předwidźane je, wot renoměrowaneho fachoweho instituta wotpowědny wědomostny koncept zhotowić dać. W nim maja so wšitke prašenja a warianty rozjimać, kak móhł so serbski kubłanski system najlěpje wuhotować. Wšelake warianty maja so najprjedy hromadźić a pod najwšelakorišimi aspektami rozjimać, na přikład zamołwitosć planowanja šulskeje syće, zamołwitosć zasadźenja wučerjow inkl. wuměnjenja za jich přistajenje, poměry přistajenych (priwatna, statna / swójska zjawna słužba), trěbny financielny wobjim a financne modele kaž tež prawniske a politiske aspekty přesadźomnosće. Dźe potajkim wo ze Zwjazkowym ministerstwom nutřkowneho 2010 wudźěłane opcije přewzaća wyšnostnych nadawkow kubłanja we wobłuku narodneho prawa. Lěpšiny a problemy kaž tež šansy a rizika dyrbja so potom w cyłku wotwažować, zo móhł so skónčnje přewšo wažny rozsud za přichod našeho ludu tworić.
Mjenowany wědomostny team ma wusko z projektowej přiradu hromadźe dźěłać, w kotrejž měli po móžnosći wšitcy akterojo zastupjeni być. Ekskursija Serbskeho sejma na přeprošenje Slavonic Europe do Wuchodneje Belgiskeje, awtonomneje němskorěčneje zhromadnosće we wuchodnej Belgiskej, skićeše k tomu dobry a spomóžny zazběh do projekta. Dalše inspirěrowace ekskursije k najlěpšim praktiskim přikładam w Europje móhli w běhu projekta slědować.
Na našim přihotowanskim zetkanju ma so tež wo financowanju projekta rěčeć. Tohodla přeprošujemy wšitkich akterow wutrobnje na
27. oktobra 2023, 18 hodź.
do Budyšina, Stareje póšty, Póstowe naměsto 3 (zachod napřećo Serbskemu domej, 2. OG, seminarna rumnosć „Schreiberplan“)
abo
wobdźělenje přez widejokonferencu: https://bbb.piratensommer.de/b/hag-0yp-bwj-snl (z přećelnej podpěru strony Piratow)
Wjeselimy na Waše wobdźělenje!