Doba kandidata za Serbski sejm podlěšena

Serbski sejm je dobu nominowanja kandidatkow a kandidatow za wólby do 2. Serbskeho sejma wo 6 tydźenjow na 22.11.2024 podlěšił. „Wjacori kandidowacy a towarstwa zdźělichu, zo njemóža trěbnych časow dla prěnjotny termin dodźeržeć, zdźěla bu woznam terminow tež wopak zrozumjeny. Nimo toho wotměwaja so hakle nětko, po wólbach krajneju sejmow w Sakskej a Braniborskej, rozmnožene rozestajenje z wólbami sejma kaž tež z wólbami serbskeje rady w Braniborskej. Tu su dalše informacije trěbne“, wuswětla rěčnik wólbneho wuběrka, Tomaš Čornak.

Tež wšitke dalše terminy wólbneho procesa so wotpowědnje přesunu, mj.dr. kónc registrowanja wolerkow a wolerjow (nětko 27.02.2025) a zjawne wuličenje hłosow (08.03.2025).

Štóž chce za 2. Serbski sejm kandidować, dyrbi so wot serbskeho zjednoćenstwa abo skupiny nominować dać a wólbnej komisiji sčasom zdźělić. Wolerki a wolerjo móža so online registrować dać: https://serbski-sejm-2024.de. Wšitke detaile rjaduje wólbny porjad, kotryž hodźi so tohorunja tam wotwołać.