DEMOKRATIE-OMNIBUS wabi we Łužicy za wólby do 2. Serbskeho sejma a do serbskeje rady

W Kamjencu je OMNIBUS FÜR DIREKTE DEMOKRATIE swoju turu po Łužicy startował, zo by na wólby do 2. Serbskeho sejma skedźbnił. Hišće hač do 20. septembra wopyta OMNIBUS mnoho městow a wsow najprjedy w Hornjej Łužicy, potom w srjedźnej Łužicy a skónčnje w Delnjej Łužicy. Crew informuje wo dźěle Serbskeho sejma, trěbnosći sylneho ludoweho zastupnistwa ze šěrokej legitimaciju a wo wólbnym procesu. Nimo toho móžeš so direktnje za wólby registrować.

„Smy zahorjeni a dźakowni, zo OMNIBUS FÜR DIREKTE DEMOKRATIE demokratiske hibanje ‚Serbski sejm’ a serbski lud přez wjacore tydźenje z tutej turu podpěruje“, měni Tomaš Čornak, kiž turu nawjedujo organizuje (kontakt: 0173 2673101).

Werner Küppers, kiž OMNIBUS FÜR DIREKTE DEMOKRATIE hižo wjele lět wodźi a so wot dobrowólnikow přewodźa, dodawa: „Zaměr Serbskeho sejma, we wažnych prašenjach přichoda serbskeho luda sam zamołwitosć přewzać a bazodemokratisce na městnje rozrisanja pytać a zhromadnje zwoprawdźić, přinjese nadźiju a naladu zazběha do aktualnych, za demokratiju ćežkich časow, tež Łužicu přesahowacy. Je so za nas hnydom z wutrobnej naležnosću stała.“

„W Delnjej Łužicy budźe OMNIBUS FÜR DIREKTE DEMOKRATIE runje tak za paralelnje so wotměwace wólby Rady za naležnosće Serbow při Braniborskim krajnym sejmje (via www.wahl-rasw.de) wabić“, wjeseli so Rainer Vogel, čłon we wólbnym wuběrku za braniborsku serbsku radu a kandidat za 2. Serbski sejm.

Tourowy plan móže so kóždy dźeń aktualnje na www.serbski-sejm.de wobhladać. Pytaja so hišće sobuwojowarjo, kotřiž chcyli w OMNIBUS-teamje stajnje za jedyn dźeń sobuskutkować.

Wolerki a wolerjo dyrbja so hač do 23.01.2025 k wólbam registrować.

Serbski sejm je demokratisce legitimowane ludowe zastupnistwo Serbow a zasadźuje so za zjawnoprawnisku korporaciju serbskeho ludu a nutřkowne samozarjadnistwo, wosebje w kubłanju a kulturje.