Debata zwjazkoweho sejma wo charće rěčow njeje akceptabelna

K debaće zwjazkoweho sejma „25 lět EU-charty regionalnych abo mjeńšinowych rěčow“ wupraja so Hajko Kozel, rěčnik prawniskeho wuběrka serbskeho parlamenta Serbski sejm:

„Derje na debaće je widźomne předstajenje škitanych regionalnych a mjeńšinowych rěčow. Debata degenerowaše pak w zašłej dekadźe přeco bóle na prózdnu flosklu, wot někotrych samo jako klamauk zrozumjeny a zwjazana z tendencu, bytostne deficity zatajeć. Tole chcu najjasnišo kritizować.

Zwjazkowa republika chwali so, zo wobšěrnje dźiwa na minimalne standardy rěčneje charty. Při tym zapraji statny kubłanski system we Łužicy na šěrokej fronće: Wuhotowanje ze serbsce rěčacymi wučerjemi njeje zaručene a ma zdobom wosłabjenu prioritu. W dwělu dyrbja tući najprjedy němsku wučbu sporta zawěsćić. K tomu přińdźe, zo so dźěćom we wospjetnych padach jich zakonsce zakótwjene prawo na serbskorěčnu wučbu zapowědźi.

A zo by sej mjerzanje ze šije dźeržał, wuzamkuje němski stat serbski lud wotpowědnje wot prawa skorženja.

Składnostnje dźensnišeho dnja najhórša pozdatna swjatosć pak je, zo Zwjazkowa republika přeco hišće prěje indigenitu serbskeho ludu, zo by jemu zapowědźił přistejace woprawdźe substancielne samo- a sobupostajowanske prawa wotpowědnje ILO 169, kotrež bu před nimale dwěmaj lětomaj přez Zwjazkowy sejm ratifikowane.

Tole njebudźemy dale akceptować, ale přihotujemy trěbne prawniske a politiske kročele, zo bychu so njewužitne prawa na papjerje skónčnje z realnymi prawami stali.“