45. posedźenje Serbskeho sejma, Budyski hród

Dnju 26. oktobra 2024 wotmě so w Dźiwadle na hrodźe Budyšin 45. posedźenje Serbskeho sejma. Posedźenje přinjese rjad wažnych temow k diskusiji, kotrež nastupaja přichod serbskich institucijow a serbskeje zhromadnosće.

Jako rozmołwne partnerki při tradicionelnje na spočatku so wotměwacej wuměnje z hosćimi móžeštej so z Andreju Pawlikowej, muzejownicu w Serbskim muzeju, a Hanku Jenčec, serbskej dramaturgowku w Němsko-Serbskim ludowym dźiwadle, dwě zastupjerce na hrodźe skutkowaceju serbskeju institucijow witać. Diskutowachu so nuzne strukturelne a personelne wužadanja w detailu, kaž njedostatk na dorosće we wobłukach technika, zarjadnistwa, činohra a serbskorěčna dźiwadłowa pedagogika. Wobsteji trěbnosć, rěčne kmanosće w serbskich institucijach skrućić a rěč spěchowace iniciatiwy kaž Zari dale wutwarjeć. Nimo toho namjetowaše so zarjadowanje wosebiteho fondsa k financowanju swobodnych sobudźěłacych w dźiwadźelenju, při suflěrowanju a přełožowanju. W muzejowym wobłuku ma so nimo toho lajska muzejowa syć skrućić a podpěrać.

Kulturnopolitiski wuběrk sejma budźe tute temy zapřijeć. Prócuje so, dalše serbske kulturne institucije aktiwnišo do dźěławosće wuběrka zapřijeć.

W naslědnym sejmowym plenumje so dojedna, w druhim čitanju předležacy naćisk statneho zrěčenja k rjadowanju prawow samo- a sobupostajowanja serbskeho ludu nětko jako mjezystaw zjawnje diskutować a k tomu wšitkich zajimowanych a serbske institucije a zwjazki přeprosyć.

Nominowanje kandidata za serbsku radu při Sakskim krajnym sejmje so přez oficialne pismo prezidentej krajneho sejma a frakcijam dale doprědka ćěri. Nimo toho buchu mnohostronske nadawki při dospołnje čestnohamtskej organizaciji wólbow do 2. Serbskeho sejma dale wothłosowane. Mj.dr. startuje bórze socialna medijowa kampanja.