2. Serbski sejm je so skonstituował
W swjatočnej atmosferje, wobrubjenej wot ekumeniskeje nutrnosće a swjedźenskeho zarjadowanja, zahajichu nowowuzwoleni serbscy zapósłancy swoje politiske dźěło. Demokratiske ponowjenje Serbskeho sejma bu z konstituowacym posedźenjom w radnicy Łaza 12. apryla zakónčene. Nětko započnje so druha legislatura 2018 prěni raz woleneho serbskeho ludoweho zastupnistwa.
Městopředsydka wólbow Marlis Pjacec z Dobrošic přepoda nowowuzwolenym zapósłancam jich pomjenowanske wopisma. Zapósłancy prěnjeje legislatury, kotřiž běchu wot meje 2024 swobodne wólby organizowali, dóstachu wot najstaršich přitomnych nowych zapósłancow, Rainera Vogela ze Złeho Komorowa, swoje dźakne wopisma. Pod wočemi mnohich žurnalistow, zastupjerjow Domowiny a druhich serbskich towarstwow, politiskich reprezentantow a dalšich hosći zanjesechu zapósłancy 2. Serbskeho sejma serbsku hymnu „Rjana Łužica“ a zahajichu konstituowace posedźenje.
Po wotewrjenju přez starobneho prezidenta Rainera Vogela buštej pod nawodom dr. Tomaša Wornara z Drježdźan jednanski porjad a manifest Serbskeho sejma jednohłósnje wobzamknjenej. Z tym wobnowi Serbski sejm swoje wuznaće k čłowjeskim prawam, zakładnemu zakonjej a krajnym wustawam, k serbskim rěčam a k respektnemu a wěcownemu wobchadźenju. Jednanski porjad předwidźi kaž w prěnjej legislaturje dale na konsens wusměrjene rozrisanje konfliktow a konstruktiwne weto jako dźěłowe zakłady.
Dale informowaše so wo zarjadowanju změrcowskeje komisije, kotraž rozsudźi wo wotpr1ewanju wólbow do 2. Serbskeho sejma.
Wólby prezidija, wutworjenje wuběrkow a postajenje społnomócnjenych přewjedu so na přichodnym posedźenju dnja 14. junija 2025. Wšitke protokole a wobzamknjenja Serbskeho sejma su pod https://dokumenty.serbskisejm.de dowidźomne, wšitke posedźenja su zjawne.
Łazma wosebity wuznam za serbske narodne hibanje. Tu skutkowachu mj. dr. Handrij Zejler, Jurij Malink a Jan Pawoł Nagel. Před konstituowacym posedźenjom zetkachu so zapósłancy a hosćo we Łazowskej cyrkwi, hdźež přednošowaše Günter Wjeńk, wosadny cyrkwinski radźićel z Drěwc, w serbskej rěči k stawiznam cyrkwje. Pod přewodom pišćelow Alexa Pólka z Worklec nawjedowaštaj fararjej Gabriš Nawka z Kulowa a Christian Huth z Łaza dwurěčnu ekumenisku Božu słužbu.
Po połoženju wěnca při pomniku Handrija Zejlerja zahaji so w radnicy swjedźenske zarjadowanje. Dr. Christiana Piniekowa z Choćebuza wuzběhny w swojej swjedźenskej narěči zwiski mjez dotalnej politiskej marginalizaciju serbskeho ludu ze stratami přez rěčnu asimilaciju a dewastowanje přez brunicowe hórnistwo we Łužicy. Wona skedźbni na prawniske posudki k polěpšenju politiskeho sobuskutkowanja, kotrež wjedźechu wot 2010 k wutworjenju Serbskeho sejma.
Po předčitanju postrownych słowow a zbožopřećow bu prěni raz po Janu Skali pomjenowane čestne myto Serbskeho sejma Edith Pjeńkowej z Rownoho, Johannes Heimrath z Małeho Jazedowa a dr. Měrćinej Wałdźe z Njeswačidła spožčeny. Hudźbny přewod přewza Dieter Gebauer z Choćebuza/Cottbus.
Narěče, lawdacije, přizjewjenja a postrowne słowa so w běhu swjedźenskeho zarjadowanja a konstituowaceho posedźenja ze serbskich rěčow do němčiny tołmačachu. Přez to čini Serbski sejm mjezsobnosć wšitkich rěčow dožiwjomnu a samozrozumliwu.