Załožba a prědne pósćenje „Myta Jana Skale“ Serbskego sejma
Pśi góźbje konstituěrujucego pósejźenja 2. Serbskego sejma jo se prědny raz pósćiło „Myto Jana Skale“. Cesne myto Serbskego sejma pśipóznawa wusegujucy angažement za samopóstajenje a kulturno-politisku emancipaciju serbskego luda. Prědne lawreatki a lawreaty su Edith Pjeńkowa z Rownego, Johannes Heimrath z Małego Jazedowa a dr. Mjertyn Wałda z Njeswačidła.
Edith Pjeńkowa pócesćijo se za swój cas žywjenja trajucy angažement k zachowanju kultury, rěcy, pśirody a domownje Łužyce. Wóna stoj ako pśikład za swójo stajanje pśeśiwo góspodaŕskim zajmam na kosty domownje ako teke za jeje statkowanje ako prědna starstwowa prezidentka Serbskego sejma.
Johannes Heimrath pócesćijo se za swój wjelebocny a njesebny angažement za enkelcomnu, ekologisko-socialnu a kulturnje wjelebocnu towarišnosć, wósebnje za swój wažny pśinosk k politiskej samorganizaciji serbskego luda ze swójeju njewomucneju pódpěru Serbskego sejma k na konsens orientěrowanemu źěłoju město konfrontatiwnych debatow w parlamenśe.
Dr. Mjertyn Wałda pócesćijo se za swójo wobstawne a zmužne zasajźenje, serbski lud z role pšosarja rozwězaś a jomu – z wědomnostnym rozjasnjowanim, zjawneju debatu a politiskim sebjepóstajenim – pomagaś k sebjewědobnemu městnu ako rownogódny a samopóstajony partnaŕ w towarišnosći.
Mjenjodawaŕ myta jo Jan Skala (1889-1945) – žurnalist, lyrikaŕ, politikaŕ a jaden z nejwuznamnjejšych pśedmyslarjow serbskego samopóstajenja w 20. stolěśu. Skala njejo wiźěł Serbow ako kulturnje nakšomnu kupku, ale ako samostatny lud z pšawom na politiske samozastupowanje a narodne wuwiśe. Cas swójogo žywjenja jo se wón stajił pśeśiwo asimilaciskej politice nimskego narodnego stata a jo rownocasnje kritizěrował jano folkloristiske zawupytnjenje serbskeje identity. Ze załoženim Łužyskeje ludoweje strony 1919 jo se wón procował wó politiske zastupnistwo Serbow – jasne znamje za jogo pśedstajenje serbskeje awtonomije. Pśez swójo mjazynarodne statkowanje, na pśikład pla Europejskich narodnostnych kongresow w Genfje, jo Skala wustajił serbske pšašanje w europskej debaśe mjeńšynowego pšawa. Publicistiski a politiski jo wón se z dorazom zasajźował za samske pšawa Serbow – nic ako pšosaŕ w swójskem kraju. Myto Jana Skala Serbskego sejma co na toś to stojnišćo dopominaś a tych pócesćiś, kenž stoje źinsa w duchu Skale za pšawa a pśichod serbskego luda. Wón jo dotěrowany ze slobraneju glicku, kótaraž pokazujo płod lipy.
