Napominanje serbskich wósobinow k wólbam do 2. Serbskego sejma

29. januara su w Nimsko-Serbskem ludowem źiwadle wuznamne serbske wósobiny na casnikaŕskej konferency swójo napominanje wusměrili na serbski lud k wobźělenju na wólbach do 2. Serbskego sejma.

Casnikaŕsku konferencu jo nawjedował Benedikt Dyrlich, kenž jo gromaźe z dalšnymi pśibytnymi pódpisarjami apela wuzwignuł wažnosć wólbow Serbskego sejma a šyroke wobźělenje na wólby. W swójich wuwjeźenjach su wóni rozkładli, cogodla toś te wólby su směrdajucy rozsud za serbske zgromaźeństwo.

Prědny pódpisowaŕ Tomaš Rječka jo wustajił: „Kluc za dalejwobstaśe našeje rěcy lažy w šulskich ramikowych wuměnjenjach za naše źiśi. Toś te muse w našej ruce lažaś. Za to jo kubłańska awtonomija z mócnym ludowym zastupnistwom pšawy puś. Togodla wuzwólśo Serbski sejm, aby wón mógał toś to pominanje pśesajźiś! ”

Sobupódpisowaŕ Tomasz Nawka wudopołnjujo: „Stawizny nas wuce, až jo naš lud bźez swójskeje mócy rozsuźenja pśecej zasej znowa pokazany na pśichylnosć wětšynoweje towarišnosći. Smy z tym kaž grajne balo pó zajmach drugich. Wěcej ako sto lět wobstoj zaměr, toś tu njamóc pśewinuś. Ze Serbskim sejmom jo toś ta wizija kradu bliska. Togodla napominam wšyknych, sobu wuzwóliś a dowěru wugroniś dobrym kandidatkam a kandidatam.“

Dalšne śěžyšćo casnikaŕskeje konference jo było pśedstajenje śěžyšćow kubłańskego koncepta, pśedłogi statnego dogrona a wustawowego procesa, kenž su wujšli ze źěła 1. Serbskego sejma. Naśiski a koncepty mógu se pód www.serbski-sejm.de w meniju dokumenty póglědaś.

Napominanje we formje ako teke lisćina pódpisarjow se pśipołožyju ako pśiłožk. To su Tomaš Rječka, Marko Suchy, dr. Christiana Piniekowa, dr. Grit Lemke, dr. Viktor Zakar, Hella Stoleccyc, Róža Domašcyna, Benedikt Dyrlich, Reiner Nagel, dr. Pětr Kroh, Lutz Hillmann, Hanka Jenčec, Alexander Pólk, Wolfgang Krause, Ludmila Budarjowa, Alfons Wićaz, Maja Nagel, Pawoł Rota, Jens Zahrodnik, dr. Pětr Wjacławk, Matthias Körner, Křesćan Krawc, Cosima Stracke-Nawka, Tomasz Nawka, dr. Arnošt Wirth a dr. Měto Wałda.

Wólby do 2. Serbskego sejma su ako cyste listowe wólby 2024 zachopili a wótměju se paralelnje k wólbam zwězkowego sejma. Až do 27. februara 2025 mógu se wólarje a wólaŕki za wólby registrěrowaś na wólbnej stronje www.serbski-sejm-2024.de ako tam teke woglědaś listy a fota kandiděrujucych, aby twórili funděrowany rozsud.

Kužda/y wót 16 lět, kótaraž/kótaryž pśisłuša k serbskemu ludoju, daś se wuznajo dla swójeje rěcy, kultury, bydlišća abo z drugich pśicynow, jo k wólbam napominana/y.