2. Serbski sejm jo se konstituěrował
W swětocnej atmosferje, whbrubjonej wót ekumeniskeje nabóžniny a swěźeńskego zarědowanja, su zachopili nowowuzwólone serbske wótpósłańce swójo politiske źěło. Demokratiske hobnowjenje Serbskego sejma jo se z konstituěrujucym pósejźenim dokóńcyło w radnicy Łaza/Lohsa dnja 12. apryla. Něnto zachopijo se druga legislatura 2018 prědny raz huzwólonego serbskego ludowego zastupnistwa.
Zastupujuca wjednica wólbow Marlis Pjacec z Dobrošic jo pśepódała nowohuzwólonym wótpósłańcam jich pomjenjeńske hopisma. Wótpósłańce prědneje legislatury, kótarež su wót maja 2024 liche wólby organizěrowali, su dostali wót nejstaršego z pśibytnych nowych wótpósłańcow, Rainera Vogel ze Złego Komorowa, swóje źěkowańske hopisma. Pód hokami wjele žurnalistow, zastupnikow Domowiny a drugich serbskich towaristwow, politiskich reprezentantow a dalšnych gósći su wótpósłańce 2. Serbskego sejma zanjasli serbsku hymnu „Rědna Łužyca“ a su zachopili konstituěrujuce pósejźenje.
Pó wótwórjenju pśez starstwowego prezidenta Rainera Vogela jo se pód nawjedowanim dr. Tomaša Wornarja z Drježdźan hobzamknuł jadnański pórěd a manifest Serbskego sejma jadnogłosnje. Z tym wótnowijo Serbski sejm swójo huznaśe k cłowjeskim pšawam, zakładnej kazni a krajnym hustawam, k serbskim rěcam a k respektnemu a wěcownemu hobchadanju. Jadnański pórěd pśedwiźi ako w prědnej legislaturje dalej na konsens orientěrowane rozwězanje konflikta a konstruktiwne weto ako źěłowej zakłada.
Dalej su informěrowali wó zarědowanju hujadnańskeje komisije, kótarež rozsuźijo wó wótchyśenju wólbow do 2. serbskego sejma.
Wólby prezidiuma, hutwórjenje huběrkow a póstajenje zagronitych se pśewjadu na pśiducem pósejźenju 14. junija 2025. Wšykne protokole a hobzamknjenja Serbskego sejma su pód https://dokumenty.serbskisejm.de k dowiźenju, wšykne pósejźenja su zjawne.
Łaz/Lohsa ma wósebny huznam za serbske narodne gibanje. How su statkowali mjazy drugim Handrij Zejler, Jurij Malink a Jan Pawoł Nagel. Do konstituěrujucego pósejźenja su se wótpósłańce a gósći we łazojskej cerkwi zmakali, źož jo Günter Wjeńk, wósadny raźc z Drěwcow, w serbskej rěcy wó stawiznach cerkwje pśednosował. Pód pśewóźowanim orgelow Alexa Pólka z Worklec stej nawjedowałej fararja Gabriš Nawka z Kulowa a Christian Huth z Łaza dwójorěcnu ekumenisku namšu.
Pó połoženju wěnca pśi pomniku za Handrija Zejlerja jo se zachopiło w radnicy swěźeńske zarědowanje. Dr. Christiana Piniekowa z Chóśebuza jo huzwignuła w swójom swěźeńskem nagronje zwiski mjazy doněntejšneju politiskeju marginalizaciju serbskego luda z tšuśami pśez rěcnu asimilaciju a dewastaciju pśez brunicowe górnistwo we Łužycy. Wóna jo pokazała na pšawniske pósudki k pólěpšenju politiskego sobustatkowanja, kótarež su wót 2010 k hutwórjenju Serbskego sejma wjadli.
Pó pśecytanju póstrownych słowow a glukužycenjow jo se prědny raz pó Janu Skalu pomjenjone cesne myto Serbskego sejma pósćił Edith Pjeńkowej z Rownego, Johannesa Heimratha z Małego Jasedowa a dr. Mjertynoju Wałźe z Njeswačidła. Muzikaliske pśewóźowanje jo pśewzeł Dieter Gebauer z Chóśebuza.
Nagrona, lawdacije, pśizjawjenja k słowoju a póstrowne słowa su se na swěźeńskem zarědowanju a konstituěrujucem pósejźenju ze serbskich rěcow pśestajili do nimšćiny. Pśez to jo Serbski sejm zawěsćił, až juo se gromada wšych rěcow dožywiła a se wót samego rozměła.